Vorspann: Miär Schlossnarre sin multikulturell und sin sicher kai Rassischtä.
1. Melodie: Basler Schnitzelbankmelodie 3
Muesch multikulturell si hüt – mit allnä zemä läbe
doch das isch schwirig mit de Fraue – mir chön das chum verträge.
Rassistisch sin's das isch doch trurig – fön jedes mol a lärme,
wenn-mir us Versehe tüen – vom chline Schwarze schwärmä.
Vorspann: Die Autofahrt vo dä Andrea Giordano isch grad no mol guet usgange..
2. Melodie: Alpeflug
Tip top gschteilet, usepützlet, und au sicher nüt vergesse,
so d'Andrea stiigt ins Auto fahrt uf Rohrschach wäg m'e Esse.
Si git Gas fahrt immer schneller bis es tschäppret uf em Dach,
und denn lütet grad no s'Händy, mein Gott so ne dummi Sach.
Si nimmt Gas weg sucht das Händy isch es vorne isch es hinde,
so ne Saich wenn si meh Ornig het chönt si de Chnoche findä.
Doch denn schaltet s'Händy dure über d'Auto-Alag chunz,
es isch nume ihre Michi wo tuet störe weg mä Brunz.
Und in Rorschach bim Us-stiige tuet si s'Händy nomol sueche,
s'isch nid ume, Gott-ver-Deckel, jo am liebschte wür si flueche.
Doch denn endli chunt d'Erlösig, ihri Chneü die werden schwach,
si gsiet s'Handy, s'hebt magnetisch nid zum glaube - uf em Dach.
Vorspann: Üserä König isch erscht grad wieder gwählt worda. Dä Tanner, selbstbewusst und bodeständig, seit was er will….Me het sogar usegfunde, dass es Gmeinsamkeite zwüschet em Ex-Präsident vo Amerika, am Trömp, und üserem König, am Tanner git….»
Wenn dä Trömp mol öpis will sägä, denn chunt das grad wiä nes Gwitter,
doch nüt vo dem chunt ir Zitig, er schriibt das nu i sin Twitter.
är hät jetz sine Loh, är isch jetz nüme do.
Üsre König machts besser – wenn är öpis wet sägä,
üsre König isch super – drum lön mir ihn au läbä.
är brucht nume drü Wörtli – das isch scho gnueg für ihn.
är kennt nume drü Wörtli – das isch sicher nid schlimm,
är seit alls mit drü Wörtli – und das mit luter Stimm.
Diä drü Wörtli vom König – "iech will nomol",
helfen üserem König – er will nomol.
Königin will nid helfe – hät d'Nase voll,
will si mags nüme khöre – wenns heisst – iech will nomol.
Und si seit denn zum König – gib Rueh – das-Jour häsch doch scho mol.
Vorspann: De frisch pensionierti Gmeindspräsident vo Wangs-Vilters, de Berni Lehnherr isch nid ganz uschuldig dra, dass d Chrankekasse-Prämie das Jour fascht nid gstiige sin….
4. Melodie: Oh Walensee
Diä Prämie stiigen jedes Jour,
für d’Volkswirtschaft – ä grossi Gfour.
Wäg jedem Furz muesch türi Pillä poschte,
und au d’Verwaltig tuet ä Hufä choschtä.
Au d’Ärzt wen d’Löhn nid abefahrä,
drum tüends jetz – bi dä Pensioniertä spare.
Am Berni wens Proschtata – nid operierä,
är heg jetz gnueg-Zit – zum urinierä.
Vorspann: D'Betina Manz, de Big Boss vo de Werbeagentur " die Eine", chan uf ä erfolgrichs Gschäftsjour zruggluege….
5. Melodie :Basler-Schnitzelbank 2
Ufstiegs-Schaanse häsch als Chef ä keine,
das stimmt nid – seid Bettina vo de "Eine".
Stolz hät si drum i üsers Chäsblatt gschriibä,
si seg vom Parterr – in erste Stock ufgstiige.
Vorspann: Villicht hät de eint oder ander gmerkt, dass üsi Vorgruppe, d'Vaccanser das Jour a de Schnitzelbänk fähled….es het gheisse, si trauen dene neue Corona-Impfstöffer nid…
6. Melodie: Vacanser
Vor Corona Langzit-Folge do wird überrall gschriibe,
d'Vaccanser diä hen Schiss, si müen diheime bliibä
Dä Robin folget nid, tuet alles ignoriere,
doch er hät Glück – und cha zum Nörgeler mutiere.
Und ihr Vacanser tüen doch Freud und kei TamTam ha,
ihr hend das Jour mit Abstand euers bescht Programm gha.
Vorspann: Sie Herr Maharadscha Hadschi, Sie sötten denn unbedingt no gschwind bi üsnä Kollege, dä Nörgis verbii. Die hin diä glichä Sorgä wiä miär Schlossnarre. Die hin au immer weniger Beize und Lokal wos ufträte chön.
7. Melodie: 10 kleine Jägermeister
Füf schüni Chruutbuchbeize diä sin eimol
gsi,
im Tandem gits kei Gratisbier drum gön mir nüme hi.
Vier schüni Chruutbuchbeize wieder minus
eis,
dä Schnider seid diä Fasnacht i mim Bergwerch isch en Scheiss.
Drü schüni Chruutbuchbeize chömen nid zur
Rueh,
Z'Nelli macht jetz nümä mit und s' Garni das gout zue.
Zwei schüni Chruutbuchbeize jetz chunt
s'Obertor,
gits nüme will ir Suppe hät mä gfunde glaub es Hohr.
Eis schüns Chruutbuchbeizli au döt chasch nümm
hi,
bim Fäh do hen mir zwei mol gsunge denn isch pleite gsi.
Bald kei Chruutbuchbeize me, doch niemer cha üs zwinge,
dass mir zum Schoss Sargans uf gön – und eis für d'Häx tüen singe.
Vorspann: Mir hen z’Böllehuse au jedes Jour ä grousses Volkfescht….mit Chüeh uf dr Schtrouss…. Eimol isch es aber biz anderscht gsi:
Isch si, isch si nid, sind Zueschauer erlaubt, dörf dä neu Dorfplatz benutzt werde? - Jo genau. Mir reden vo der Alpabfahrt 2020 z Böllehuse.
8. Melodie: Mini mini Freud isch diä
Alpabfahrt vo Mels ä grossi Traditio
Wäg Corona isch das s'letzscht Jour nid eso.
Und de neui Dorfplatz dä bliibt lär,
keine chas verstoh, das isch nid fär.
Für d'Sarganser Chüe do häts ä Usnahm geh,
tüenä sogar uf em Platz no Wasser geh.
Üsi Chüe sin glückli – hend das estimiert,
und dä Dank grad mehrfach – deponiert.
Vorspann: En Sarganser Fürwehrtrupp under de kundigä Leitig vom Oberlütnant Andi Peter zeigt bimnä Isatz, das z'Geld für üsi Fürwehr guet inveschtiert isch….
9. Melodie: Sie hei dr Willhelm Tell ufgfüert
En Füralarm im Böllniland jo das häts letscht Jour geh,
de Andy tuets Kommando für dä Isatz überneh.
Und scho gouts los links weg bim Garni rasens wie dä Blitz,
doch denn wird bremst und kehrt bim Kreisel jo das isch kei Witz.
Und für diä Umchehr hät dä Andy müessä überzüge,
das Füür das sig im Melserhof do muesch nit links abbüge.
Und nomol gouts verbei bim Garni wieder wie nes Gschoss,
doch das mol vo dä andre Site Himmel was isch los.
Noch zä Minute s'dritt mol denn si brausen wie dä Wind,
ums Garni vo dä andre Sitä, dä-Chef versteckt dä Grind.
Mit viel Verspöütig denn am Ziel, leck Andy bisch du doof,
häsch s'Ziel verwechslet – sisch nid Melser sondern Schwizerhof.
Vorspann: Dä Max Figewinter hät Höllequale glitte, woner uf em Rugge i dä Brombeerstude gläge isch. Wenns noch sinre Theres gange wär, hetten diä Dorne gar nid so schnell müesse usä….
10. Melodie: Mein kleiner grüner Kaktus
Vor's chunt go schneie
bim Rase meie
i'd Brombeerstude rückwärts gheie.
Es tuet bim ligge
ganz zünftig pigge
de Max hät Schmerze und muess schreie.
Überall Dorne
hinde und vornä
tüen sini Gsundheit ruiniere.
Wiso jetz böüge
tuet Theres möüge
mir chön vo dem au profitiere.
Dä Max isch wie nen Kaktus, und i ha dä dihei,
holderi, holderi, holdero.
Drum bruch i au kein Wachhund, und au kei Polizei
I bi froh, er isch so, isch eso.
Und wenn denn vor de Tür, mol isch en Bösewicht,
denn hol i minä Mäxli und dä sticht, sticht, sticht.
Mi-in chlinä stramme Mäxli, de hät bi mir sis Plätzli,
sticht eso, i bi froh, lönd nä so.
Vorspann: Mir hen immer gmeint, die Herre im Chlöschterli sigen altmodisch, do hen mir aber üsi Meinig müesse revidiere….
11. Melodie: Basler Schnitzelbankmelodie 3
Im Klöschterli do sigen schins – no sechs Mönch iquartiert,
an Politik und Gsellschaft sin – diä Manne intressiert.
Drum hen si gschribä Mail und Brief – uf Bern ä ganzes Fueder,
obs mögli wär dass d'Ehe für alli – au gilt für Brueder und Brueder.
Vorspann: Am FC-Grufti Philipp Müller isch es sehr wichtig, dass immer choschte-bewusst ikauft würd…
12. Melodie: Er hat ein knallrotes Gummiboot
Er hät ä vil – z'grosses Libli a, lueg mol dä Philipp a, was isch do los,
und mit dem vil – z'grosse Libli do, tuet er bim Muschti stoh, jo das isch famos.
Er hät bim Ottos diä Libli entdeckt, für füf-zeh Stutz zwei mol X-L,
das isch es Schnäppli für zwei neui Libli, er kombiniert das ganz schnell.
Und spöter denn bim usprobiere, sin nid zwei X-L – so nä Scheiss,
das isch diä Grössi X-X-L, defür giz numä eis.
Er hät äs sau – grosses Libli gnoh, mir chönd das guet verstoh, für fascht kei Geld.
das gits susch nie – so'nes Libli do, in Über-Grössi so – wiä nes Zikuszelt.
Vorspann: Jo das Tinder für Inder mag scho en Flop gsi si….was aber ganz sicher kein Flopp isch, das isch in Böllehuse der neui, wunderschöne Böllniplatz….
13. Melodie: O Walensee
Ragazer Kunscht – tuet fasziniere,
au Böllni tüen – Kunscht konschtruiere.
Bim Melserhof – zwei Sülä und es Himmelstor,
denn chunt ä Wand – mit Böllächöpf stousch grad devor.
Uf jedem Chopf isch igrafiert,
wenn ä Böllekönig hät regiert.
Es Riesä-Gschiss weg dem – im Böllniland,
für üs ä ganz normali – Urnewand.
Vorspann: De Sepp Turnell isch nid nu i sim Gurme-Tempel, im Gonzecheller ums Wohl vo sine Gäscht b'sorgt, er macht sit neuschtem au no Huusbsüech bi sinä Stammchunde…
14. Melodie: Schacher Seppeli
I bi de Turnell Seppeli – bi mir gits feini Bier,
drum chunt de Hobi Päuli au – a jedem Tag zu mir.
Doch eimol isch dä Parkplatz lär – dä Päuli isch nid cho,
und won er spöuter git es Fon – cha-dä Sepp ihn nid verstoh.
So lout de Sepp denn alles hogge – und fahrt zum Päuli hei,
will niemer Türe öffne tuet – do holt er Polizei.
Noch vielnä Arüef hends nä gfunde – z' St.Galle im Spitol,
doch denn seid d'Schmier hey Sepp du stinksch – das isch doch Alkohol.
Dä gueti Sepp hät welle helfe – zum Dank jetz müend ihr lousä,
do hät ihm t'Schmier es Grätli geh – und er hät müesse blouse.
Doch z'Grät das zeiget null Promill – ä sonä Neuzit-Plunder,
für Polizei es Fänomen – für-de Sepp isch das es Wunder.
Vorsann: De ehemalig Wirt vom Zunfthuus Leue im Städtli, de Helmut Daxinger, suecht no öpprt wo tschuld isch….
15. Melodie :Basler-Schnitzelbank 2
De Helmuth fahrt mol mit em Auto amnä Morge,
in Eco Hof und wett döt allerhand entsorge.
Doch sinä Kofferruum isch leer – wer tuet ächt das verschulde.
Mögli das sis Vreni lieber – ihn wett i dä Mulde.
Vorspann: Jo dä Lehrer Hänggi isch en furchtbare Typ, är hät sim Lehrer-Kolleg Dominik Berni dä Polterobig gründli verdorbe…
16. Melodie: Mir fahred mit der SBB
Uf sinä Polterobig hät dä Dominik sich gfreut,
am Hänggi heg är alls verzellt, und spöüter denn bereut.
Dä Hänggi seit en Polterobig, schreckli tuet nid gut,
au är heg das erfahre müesse – würsch plouget bis ufs Bluet.
Vo denä Greuelgschichte gits bim Dominik ä Schogg,
am liebschte würd er sich verchrüche vor dem Polter-Hogg.
Doch denn bisst är in surä Öpfel, nüt würd annulliert,
und hät vor Schiss all sini Uswiis –
Bluetgruppe,
Rega,
Patientenverfügung,
Organspender-Uswiis
bim Hänggi deponiert.
Vorspann: Me cha en riiche Inder hole, wemä Gäld brucht. Aber es git au no anderi Methode, zum d'Kasse vomne Verein ufpoliere….
17. Melodie: s`Guggerzitli
Hend ghört in Trüebbach brucht de FC – no Geld für Tschutti-Gwänder,
si machen Fottnä halbe blutt – sig für dä neu Kalender.
Au-d'Vacanser Wiiber denken jetz – so Fotnä wären guet,
doch fürä so nä Sex-Kalender – hen si zwenig Muet.
Drum en Kalender nu mit Bruschtbild – so hen si siech entschiide,
Wil Bei und Füttlä uf em Foti – das sig scho übertriebe.
Doch no dem Bsuech bim Fotograf – do herrscht denn nu no Fruscht,
wil für es Bruschtbild hegen sie – leider z'wenig Bruscht.
Vorspann: Psunders wertvoll isch notürli au dä Leo Raimann. I dä Launch vom Fuessball-Stadion z Basel, i de Heimatstadt vom Rotscher Federer, kennt är notürli dia gsamti Prominenz hinder dä Glas-Schiiba vis a vi, zemä mit mä Hufe Basler ….
18. Melodie Wellerman
I-dä Fuessball-Launsch das isch de Wahn
Dä Leo dä isch ufmerksam.
Hey lueged emol dä vis a vi,
muess vom Rotscher dä Vater si.
Und diä Basler diä gend im recht,
super Leo du bisch nid schlecht.
Dä toll Ma do vis a vi,
muess dä Vater si.
Dä Leo dä kennt no andri Lüt,
das isch sinä Glückstag hüt.
Hey lueged emol diä vis a vi,
muess vom Rotscher d'Mueter si
Und diä Basler diä gend im recht,
super Leo du bisch nid schlecht.
Diä toll Frau do vis a vi,
Das muess d'Mueter si.
Jetz isch dä Leo motiviert,
äs wird jetz richtig spioniert.
Hey lueged emol dä vis a vi,
muess vom Rotscher dä Brueder si
Und diä Basler diä gend im recht,
super Leo du bisch nid schlecht.
Dä toll Ma do vis a vi,
muess dä Bruder si.
Und spöuter denn dä Matsch isch guet,
wenn ä Basler de Leo stüpfle tuet.
Guet häsch diä Promis kommentiert,
leider aber recht blamiert.
Und diä Basler diä gend im recht,
scheisse Leo du bisch so schlecht
Vom Rotscher dä Brueder chas nid si – är hät kein Brueder
Das isch de Rotscher gsi.
Vorspann: D'Gabi Müller vo de ehemalige Fraue-Fürz macht en Imitschkorrektur. Sie leit neustens viel Wert uf ihri neu Identität als Fotostudio Gabriela Müller.
19. Ein kleiner Furz
En Fraue-Furz – und Gabi isch de Name,
en Fraue-Furz – das wet si nüme si,
si gsiet sich jetz – als feini nobli Dame,
diä schlimme Zite vo dä Fasnacht sin verbi.
Si hät sich g'ändret, in ihrem Läbe,
noch Eskapade i so mengem Jour.
Und ihre Ruef dä, will si jetz au pfläge,
zur feine Lady mit dä töntä bruä Hour, bla-bla bla bla.
Ä neue Mensch – nümm chindsch und nümm chaotisch,
ä G'schäftsfrau mit – Elan und au mit Biss.
Dä Name neu – Gabriela sig erotisch,
für üs heisst das – vom Fraue Furz zum Oma-Schiss.
Vorspann: Das Konzert vo de Schwiizer Goofä im Volkshus z Züri hät bim Zimmerma-Meischter Dario Jäger vo Vliters en bliibende Nochgschmack hinderlo,…..
20. Bin en Bueb vo jungä Johrä (F)CFA FbAFC, GFEbAGF
Wäg de Schwiizer-Goofä bis uf Züri gout de Dario as Konzert,
und er macht das mit de Meitle, das isch doch de Itritt wert.
Grad bim Igang häts es Chörbli, mit ä Hufä Päckli dri,
und es stout druf – "für diä Chlinä" – alli springen sofort hi.
Grad ä Schwetti nimmt dä Dario, schluckt eis und frougt denn es Chind,
gar kei Gschmak das hen diä Guzzli, findsch au das diä gruusig sind.
Doch das Chind das schüttlet s'Chöpfli, und es tuet uf d'Öhrli chlopfä,
diä-Guzzli cha me doch nid esse, will das sin – doch Ghörschutzpfropfe.
Andi: Corona hät das letscht Jour einiges vo üs abverlangt, mir hen müesse verzichte, teschtä, stächä, Maske träge….»
21. Melodie: O Walensee
Wäg Maske-Pflicht chasch chum me schnuufe,
us-em letzte Loch tüen Beize pfuufe
Es schwitzt und stört und tuet au stinke,
ä huere Chrampf wenn eis wetsch trinke.
Doch d'Maske isch nid numä schlecht,
nu bösi Wörtli wär nid ↓recht.
Dank Maske-Pflicht do gits au Gwünner,
will d'Böllni sin – mit Maske schünner.